പഞ്ചായത്ത് വാർഷിക പദ്ധതി 2021-2022; "ചിലർ ചരിത്രം മറച്ചു പിടിച്ച് മലർന്നു കിടന്നു തുപ്പുന്നു" - വിശദീകരണക്കുറിപ്പുമായി പ്രസിഡന്റ് ഷൈനി സന്തോഷ്

രാമപുരം പഞ്ചായത്ത് വാർഷിക പദ്ധതി 2021-2022ൽ ഭരണസമിതിയുടെ പിടിപ്പുകേടുമൂലം തുക ചെലവാക്കാതെ പാഴാക്കി കളഞ്ഞുവെന്നുള്ള ആരോപണങ്ങൾ സാമൂഹ്യമാധ്യമങ്ങളിലൂടെ പ്രചരിക്കുന്ന സാഹചര്യത്തിൽ വിഷയത്തിൽ ഒരു വിശദീകരണക്കുറിപ്പുമായി പഞ്ചായത്ത് പ്രസിഡന്റ് ശ്രീമതി ഷൈനി സന്തോഷ് രംഗത്തെത്തിയിരിക്കുകയാണ്. ഫേസ്ബുക്ക് കുറിപ്പിന്റെ പൂർണ്ണരൂപം ചുവടെ.

പഞ്ചായത്തിന്റെ വാർഷികപദ്ധതിയുടെ തുക ചെലവാക്കാതെ പാഴാക്കി കളഞ്ഞു എന്നും അതിന് പഞ്ചായത്ത് ഭരണസമിതിയെ കുറ്റപ്പെടുത്തിയും ചില രാഷ്ട്രീയതല്പരരകക്ഷികൾ സമൂഹ മാധ്യമങ്ങളിലൂടെ ദുഷ്പ്രചരണങ്ങൾ നടത്തിയ സാഹചര്യത്തിലാണ് ഇത്തരമൊരു വിശദീകരണകുറിപ്പ്. പഞ്ചായത്തിന്റെ ചരിത്രത്തിലാദ്യമായി എന്തോ വലിയ തെറ്റ് സംഭവിച്ചിരിക്കുന്നു എന്ന രീതിയിൽ ചരിത്രം മറച്ചുപിടിച്ച് ചിലർ മലർന്നു കിടന്നു തുപ്പുന്നത് കാണുമ്പോൾ ഇതെല്ലാം വർഷങ്ങളായി നേരിട്ട് കണ്ടു ബോധ്യമുള്ളവർക്ക് ചിരിയാണ് വരിക.

2021-2022 വാർഷിക പദ്ധതിയുടെ നടത്തിപ്പിൽ കോട്ടയം ജില്ലയിലെ ഗ്രാമപഞ്ചായത്തുകളിൽ അവസാന ക്രമത്തിലാണ് രാമപുരം ഗ്രാമപഞ്ചായത്തെന്നും ഫണ്ട്‌ ലാപ്സായെന്നും പ്രചരിപ്പിച്ച് ആത്മനിർവൃതിയടയുന്ന വികസന പ്രേമികൾക്ക് കഴിഞ്ഞകാലങ്ങളിൽ പഞ്ചായത്തുഭരണ സമയത്ത് നഷ്ടപ്പെടുത്തിയ കോടിക്കണക്കിന് രൂപയുടെ കണക്ക് പറഞ്ഞ് മറുപടി കണ്ടെത്തുന്നതായി കരുതേണ്ട. എങ്കിലും 2019-2020 വർഷത്തിൽ മാത്രം രാമപുരം ഗ്രാമപഞ്ചായത്തിലെ വികസന പ്രവർത്തനങ്ങൾക്ക് അനുവദിച്ച ഗ്രാൻഡ് തുകയിൽ ചെലവഴിക്കാൻ സാധിക്കാതെ 1,59,68,897 ( ഒരുകോടി അമ്പത്തിയൊമ്പത് ലക്ഷത്തിഅറുപത്തിഎണ്ണായിരത്തി എണ്ണൂറ്റിതൊണ്ണൂറ്റിയേഴ് ) രൂപ പാഴാക്കി കളഞ്ഞതിന്റെ രേഖ 2019 -2020ലെ ഓഡിറ്റ് റിപ്പോർട്ട് കോപ്പി പഞ്ചായത്തിൽ അന്വേഷിച്ചാൽ ലഭിക്കും. ആ സമയത്ത് രാമപുരം പഞ്ചായത്ത് പ്രസിഡണ്ട് ആരാണെന്നു കൂടി അന്വേഷിക്കുക. റോഡും കെട്ടിടങ്ങളും സംരക്ഷിക്കുന്ന ഇനത്തിൽ മാത്രം അന്ന് നഷ്ടപ്പെട്ടത് 93,79,355 (തൊണ്ണൂറ്റിമൂന്നുലക്ഷത്തിഎഴുപതിയൊൻപതിനായിരത്തി മുന്നൂറ്റി അൻപത്തി യഞ്ച് ) രൂപയാണ്. എന്നാൽ ഇന്ന് ഒരു രൂപയും നഷ്ടപ്പെട്ടിട്ടില്ല എന്നിരിക്കെ ഇനിയും നഷ്ടപ്പെടാൻ സാഹചര്യമില്ലാതിരിക്കെ ഇല്ലാത്ത നഷ്ടം ഉണ്ടെന്ന് പ്രചരിപ്പിക്കുന്നതിന്റെ രാഷ്ട്രീയലക്ഷ്യം തൽക്കാലം മനസ്സിൽ വെച്ചാൽ മതി.

റോഡ് വിഭാഗത്തിൽ 95.18 ശതമാനവും പൊതുവിഭാഗത്തിൽ 87.73 ശതമാനവും പട്ടികജാതി മേഖലയിൽ 91.30 ശതമാനവും ഫണ്ട് വിനിയോഗം നടന്നിട്ടുണ്ട്. കേന്ദ്ര ധനകാര്യ കമ്മീഷൻ ഗ്രാൻഡിലും നോൺ റോഡ് വിഭാഗത്തിലും പണിപൂർത്തിയാക്കിയ ചില ബില്ലുകൾ ഓൺലൈൻ നെറ്റ് പ്രശ്നത്തിന്റെ കാരണത്താൽ മാർച്ച് 30ന് മുമ്പ് എൻട്രി ചെയ്യാൻ കഴിയാത്തതും, സർക്കാരിന്റെ ചില വകുപ്പുകളുടെ പിടിപ്പുകേടുകൊണ്ട് ചില പണികളുടെ ടെൻഡർ നടപടികൾ താമസിച്ചതും, പ്രത്യേക മേഖലകൾക്ക് നിർബന്ധിതമായി മാറ്റി വെക്കേണ്ട ചില വർക്കുകൾക്ക് കരാറുകാർ ഇല്ലാത്തതുമായ പ്രശ്നം പഞ്ചായത്ത് ഭരണസമിതിയുടെ പിടിപ്പുകേടല്ല. അത് തികച്ചും സാങ്കേതികപ്രശ്നവും പഞ്ചായത്തിന് യാതൊന്നും ചെയ്യുവാൻ കഴിയാത്തതുമാണ്.

ഒന്നരമാസത്തിനുള്ളിൽ മൂന്ന് സെക്രട്ടറിമാരെ സ്ഥലംമാറ്റി അനുഭവജ്ഞാനമുള്ള ജീവനക്കാരെ ഭരണകക്ഷിമുന്നണി ഭരിക്കുന്ന പഞ്ചായത്തുകൾ സ്വാധീനം ചെലുത്തി കൊണ്ടുപോയപ്പോൾ പഞ്ചായത്തിനു വേണ്ടി വേണമെങ്കിൽ ചെയ്യാമായിരുന്ന ഒരു ആത്മാർത്ഥതയും ഭരണപക്ഷമുന്നണി മെമ്പർമാർ പഞ്ചായത്തിനു വേണ്ടി ചെയ്തു കണ്ടില്ല. വർക്കുകളുടെ ടെൻഡർ ചിലത് താമസിച്ചതിന് കാരണം ഉദ്യോഗസ്ഥ സ്ഥലംമാറ്റത്തിന്റെ ഭാഗമായി സെക്രട്ടറിയുടെ ഡിജിറ്റൽ സിഗ്നേച്ചർ അംഗീകരിച്ചു വരുന്ന താമസം ആയിരുന്നില്ലേ..? അതിൽ പഞ്ചായത്തിന് എന്ത് ഉത്തരവാദിത്വമാണുള്ളത്? ഇപ്പോൾ കവിഞ്ഞൊഴുകുന്ന മുതലകണ്ണീരിന്റെ ആത്മാർത്ഥതയും വികസന രാഷ്ട്രീയത്തിന്റെ പേരിലുള്ള കള്ളപ്രചരണ ഗിരിപ്രഭാഷണങ്ങളും തിരിച്ചറിയാൻ രാമപുരത്തെ ജനങ്ങൾക്ക് സാധിക്കും എന്ന് മാത്രം ഓർമ്മിപ്പിക്കുന്നു.

» ഫേസ് ബുക്ക് പോസ്റ്റ് കാണാനായി ഇവിടെ ക്ലിക്ക് ചെയ്യുക

Also Read » നഗരസഭ വാർഷിക പദ്ധതി ചർച്ച ചെയ്ത് നടപ്പാക്കാത്തതിൽ പ്രതിഷേധം; കൗൺസിൽ യോഗത്തിൽ പ്രതിപക്ഷ കൗൺസിലർമാർ കറുപ്പണിഞ്ഞ് പ്രതിഷേധിച്ചു.

Also Read » രാമപുരം ഗ്രാമപഞ്ചായത്ത് മുൻ ആക്ടിംഗ് പ്രസിഡന്റ് ടോമി ഉണ്ടശ്ശാംപറമ്പിൽ (58) നിര്യാതനായി