2022 ജനുവരി 23, 30 തീയതികളിൽ കർശനമായ നിയന്ത്രണങ്ങളാണ് സർക്കാർ പ്രഖ്യാപിച്ചിരിക്കുന്നത്. അവശ്യസർവ്വീസുകൾ മാത്രമാണ് ഈ ദിവസങ്ങളിൽ അനുവദിച്ചിട്ടുള്ളത്. മേൽ പറഞ്ഞ ഞായറാഴ്ചകളിൽ അനുവദനീയമായ ഇളവുകൾ ചുവടെ:
അടിയന്തര അവശ്യ സേവനങ്ങൾ, കോവിഡ് പ്രതിരോധ പ്രവർത്തനങ്ങൾ,എന്നിവയിൽ ഏർപ്പെട്ടിട്ടുള്ള കേന്ദ്ര സംസ്ഥാന സർക്കാർ ഓഫീസുകൾ, സ്വയംഭരണ സ്ഥാപനങ്ങൾ,കോർപ്പറേഷൻ, പൊതുമേഖലാ സ്ഥാപനങ്ങൾ എന്നിവ പ്രവർത്തിക്കാവുന്നതാണ്.
അടിയന്തര ആവശ്യ സേവനങ്ങൾക്കായി 24 മണിക്കൂറും പ്രവർത്തിക്കുന്ന വ്യവസായസ്ഥാപനങ്ങൾ, കമ്പനികൾ, സംഘടനകൾ എന്നിവയ്ക്ക് പ്രവർത്തിക്കാവുന്നതാണ്. മുകളിൽപ്പറഞ്ഞ സ്ഥാപനങ്ങളിലെ ജീവനക്കാർ യാത്രയ്ക്ക് സ്ഥാപനത്തിന്റെ ഐഡി കാർഡ് കയ്യിൽ കരുതേണ്ടതാണ്.
ടെലികോം, ഇന്റർനെറ്റ് സേവനദാതാക്കളുടെ വാഹനങ്ങൾക്കും ജീവനക്കാർക്കും ജോലി നിർവ്വഹണത്തിന് യാത്രയ്ക്ക് അനുമതി ഉള്ളതാണ്. അത്യാവശ്യ ജീവനക്കാർ മാത്രമേ ഓഫീസിലെത്തി ജോലി ചെയ്യേണ്ടതുള്ളൂ.
ചികിത്സ ആവശ്യത്തിന് പോകുന്ന രോഗികൾ, വാക്സിൻ എടുക്കാൻ പോകുന്നവർ എന്നിവർക്ക് ആശുപത്രി രേഖ, വാക്സിനേഷൻ രേഖ എന്നിവ ഉപയോഗിച്ച് യാത്ര അനുവദനീയമാണ്.
ദീർഘദൂര ബസ് സർവീസ്, ട്രെയിൻ വിമാനയാത്രകൾ അനുവദനീയമാണ്. എയർപോർട്ട്,റെയിൽവേ സ്റ്റേഷൻ, ബസ് സ്റ്റാൻഡ് എന്നിവിടങ്ങളിലേക്ക് യാത്രക്കാരെ കൊണ്ടുപോകുന്നതിന് പൊതു ഗതാഗത വാഹനങ്ങൾ, ടാക്സികൾ,ഗുഡ്സ് ക്യാരേജ് എന്നിവയ്ക്ക് അനുമതി ഉള്ളതാണ്. ഇപ്രകാരമുള്ള യാത്രകളിൽ കോവിഡ മാനദണ്ഡങ്ങൾ പാലിക്കേണ്ടതും യാത്രാരേഖകൾ/ ടിക്കറ്റ് കയ്യിൽ കരുതേണ്ടതുമാണ്.
ഭക്ഷ്യവസ്തുക്കൾ, പഴം, പച്ചക്കറി, പാൽ, മത്സ്യം, മാംസം എന്നിവ വിൽക്കുന്ന വ്യാപാര സ്ഥാപനങ്ങൾക്ക് രാവിലെ 7 മുതൽ രാത്രി 9 മണിവരെ പ്രവർത്തിക്കാവുന്നതാണ്. ആളുകൾ പുറത്തിറങ്ങുന്നത് ഒഴിവാക്കുന്നതിനായി സ്ഥാപനങ്ങൾ ഹോം ഡെലിവറി പരമാവധി പ്രോത്സാഹിപ്പിക്കേണ്ടതാണ്.
ഹോട്ടലുകളും ബേക്കറികളും ഹോം ഡെലിവറി,പാഴ്സൽ എന്നിവയ്ക്കായി രാവിലെ 7 മുതൽ രാത്രി 9 വരെ പ്രവർത്തിക്കുന്നതാണ്.
വിവാഹം, മരണാനന്തര ചടങ്ങുകൾ എന്നിവയ്ക്ക് പങ്കെടുക്കുന്നവരുടെ എണ്ണം പരമാവധി 20 പേരായി നിജപ്പെടുത്തുന്നു. പരിപാടികളിൽ കോവിഡ് പ്രോട്ടോക്കോൾ പൂർണ്ണമായും പാലിക്കേണ്ടതാണ്.
ഈ കോമേഴ്സ് കൊറിയർ സേവനങ്ങൾ രാവിലെ 7 മുതൽ രാത്രി 9 വരെ അനുവദനീയമാണ്. അതിനുശേഷം യാതൊരു കാരണവശാലും അനുവദിക്കുന്നതല്ല.
ടൂറിസം കേന്ദ്രങ്ങളിൽ മുൻകൂട്ടി ബുക്ക് ചെയ്തിട്ടുള്ളവർക്ക് ആയതിന്റെ രേഖകൾ സഹിതം സ്വന്തം വാഹനം/ ടാക്സിയിൽ യാത്ര ചെയ്യുന്നതും ഹോട്ടൽ/ റിസോർട്ടിൽ താമസിക്കുന്നതും അനുവദനീയമാണ്.
മത്സരപരീക്ഷകളിൽ പങ്കെടുക്കുന്ന വിദ്യാർഥികൾക്കും, പരീക്ഷ ഡ്യൂട്ടിയിൽ നിയോഗിക്കപ്പെട്ടിട്ടുള്ളവർക്കും അഡ്മിറ്റ് കാർഡ്, ഐഡി കാർഡ്/ഹാൾ ടിക്കറ്റ് ഉപയോഗിച്ച് യാത്ര അനുവദനീയമാണ്.
ആശുപത്രികൾ, ഡിസ്പെൻസറികൾ, മെഡിക്കൽ ഷോപ്പുകൾ, മെഡിക്കൽ സാമഗ്രികൾ വിൽക്കുന്ന കടകൾ, നഴ്സിംഗ് ഹോംസ് തുടങ്ങിയ സ്ഥാപനങ്ങളിലെ ജീവനക്കാരുടെ യാത്ര അനുവദനീയമാണ്.
ടോൾ ബൂത്ത്, പ്രിന്റ്, ഇലക്ട്രോണിക്, വിഷ്വൽ ആൻഡ് സോഷ്യൽ മീഡിയ ഹൗസസ് എന്നിവയുടെ പ്രവർത്തനം അനുവദനീയമാണ്.
സാനിറ്റേഷൻ ജോലികളിൽ ഏർപ്പെട്ടിരിക്കുന്നവർക്ക് ജോലിസ്ഥലത്തേക്കും തിരിച്ചും യാത്ര അനുവദനീയമാണ്.
അത്യാവശ്യ സന്ദർഭങ്ങളിൽ വാഹന റിപ്പയറിങ്ങിനായി വർക്ക് ഷോപ്പുകൾക്ക് പ്രവർത്തിക്കാവുന്നതാണ്.
